華語 台語 詩歌 英文

 

 
天上一隻蟲,掉下來壓到人 
人要跑,壓到狗; 
狗要吠,壓到位; 
位要坐,壓到棉被; 
棉被要蓋,壓到鴨; 
鴨要殺,壓到你的肚臍。
  
火車
 
火車卜行東港橋,愈行愈走愈咧叫, 
一聲短來,一聲長,真賢搖。 
搖一下來,搖一下去,嗶噗趒(tio5)。 
火車卜行西螺橋,愈行愈走愈愛搖, 
鶯歌若過是板橋,真賢搖。
  
金龜
 
金龜金龜頭趄趄(lu-lu), 
匿佇樹頂咧啄居。 
金龜金龜,細粒頭,圓身軀。 
 
財仔財
 
財仔財!對天頂跋落來; 
有目珠,無肚臍;有喙齒,無下頦; 
叫醫生,叫袂來;叫司公,扛去埋。 
阿財!阿財!厝頂跋落來;有喙齒,無下頦; 
叫醫生,叫袂來;叫土公,拖去埋。 
秀才!秀才!在馬頂,跋下來;跋一下,真厲害; 
嘴齒痛,糊下頦;目珠痛,糊目眉; 
腹肚痛,糊肚臍;嘿!真厲害。 
  
正月正
 
正月正(chiaN),聽見跋繳聲(siaN)。 
二月二(ji7),老土地(ti7)。 
三月三(saN),桃仔李仔雙頭擔(taN)。 
四月四(si3),桃仔來,李仔去(khi3)。 
五月五(goo7),西瓜排甲滿街路(loo7)。 
六月六(lak8),頭家落田拍碌碡(lak8-tak8)。 
七月七(chhit4),龍眼烏,石榴必(pit4)。 
八月八(peh4),牽豆藤,挽豆莢(ngeh4)。 
九月九(kau2),風吹滿天吼(hau2)。 
十月十,人收冬(tang),頭家倩長工(kang)。 
十一月,年兜邊(piN),家家戶戶人搓圓(iN5)。 
十二月,換新衫,來過年(niN5) 
  
白鷺鷥
 
白鷺鷥,車糞箕,車到溪子墘,
跌一倒,拾到一仙錢。
白鷺鷥,車糞箕,車到溪仔墘,
跌一倒,拾到一仙錢,拾到一仙錢。
  
羞羞羞
 
羞羞,羞羞羞,提藍仔撿雨鰡。 
羞羞,羞羞羞,提藍仔撿雨鰡。 
攏總撿幾尾,哎喲,攏總撿兩尾啦,攏總撿兩尾。 
一尾煮來吃啊嘖嘖,一尾糊目睭啍啍,
羞羞,羞羞羞。

火金姑
 
火金姑,來食茶,茶燒燒,來食香蕉,
香蕉冷冷,來食龍眼,眼淜淜,來食芭樂,
芭樂結子,咬一嘴,落嘴齒。
 
 大箍呆
 
大箍呆哎喲白目眉,無人請你就家己來。 
來來大箍呆炒韭菜,燒燒一碗來,冷冷阮無愛。 
大箍呆炒韭菜,燒燒一碗來,冷冷阮無愛。 
大箍呆,到今你才知,到今你才知。
  
打馬膠

打馬膠,粘著跤,叫阿爸,買豬跤, 

豬跤箍仔,滾爛爛,飫鬼囡仔流喙涎。

放雞鴨

一放雞,二放鴨,三分開,四做堆,五搭胸, 
六拍手、七圍牆,八摸鼻,九揪耳,十抾起。

  
新娘仔

新娘水噹噹,褲底破一空; 
頭前開米店,後壁賣米香; 
米香無人買,跋落尿礐仔底。

掩咯雞

(傳統唸謠) 
   
掩咯雞,走白蛋,隨你食, 
哎喲隨你纘(nng), 
咯雞仔囝,哎喲覓密密。 
老鼠仔囝偷做賊,一支刀咧一支劍, 
卜走唔走,唔通哮,唔通哮。

  
搖仔搖

搖仔搖仔搖荖搖,搖到內山去挽茄,挽若多? 
挽到一飯蘺,也好食,也好賣,也好互嬰仔做度睟。


搖啊搖

搖啊搖, 
豬跤雙爿撩, 
大麵雙碗燒, 
肉丸炒胡椒, 
蒜仔炒魚鰾, 
卜睏著放尿, 
出門著坐轎。

天烏烏

天黑黑,欲落雨,阿公仔舉鋤頭欲掘芋。
掘呀掘,掘呀掘,掘到一尾旋鰡鼓,
依呀嘿都真正趣味。
天黑黑,欲落雨,阿公仔舉鋤頭欲掘芋。
掘呀掘,掘呀掘,掘到一尾旋鰡鼓,
依呀嘿都真正趣味。
阿公仔欲煮鹹,阿媽欲煮淡,
倆人相打弄破鼎,
依呀嘿都隆咚叱咚槍哇哈哈!
阿公仔欲煮鹹,阿媽欲煮淡,
阿公仔欲煮鹹,阿媽欲煮淡,
倆人相打弄破鼎,
依呀嘿都隆咚叱咚槍哇哈哈!
弄破鼎,弄破鼎,
依呀嘿都隆咚叱咚槍哇哈哈!
哇哈哈!哇哈哈!

龍眼干

龍眼干,三兩半,你點燈,我來看。 
龍眼干,三兩半,你點燈,我來看。 
看啥乜,看新娘,新娘美咚咚,嫁好尪。 

挨呀挨

挨呀挨噓噓,抬雞請阿舅; 
阿舅吃無了,剩一隻雞腳爪; 
互嬰仔食無夠,置在後尾門仔嗎嗎哮。 
挨呀挨,篩米篩粟飼閹雞; 
飼雞好叫更,飼狗好吠暝; 
飼後生,養老父,飼查某仔別人兮。

煎耳爹

一年級煎耳爹,二年級捧出賣, 
三年級買一塊,四年級想要買, 
被五年級推入屎坑底, 
六年級撈起來洗。

耕農歌 
(華語)

一年容易又春天,翻土播種忙田邊,
田裡秧苗油綠綠,家家戶戶卜豐年。
東鄰荷鋤上山岡,西鄰趕牛下池塘,
哥哥犁田嫂播種,汗珠如雨滿衣裳。
牧童晚歸把歌唱,閃爍星星半隱藏,
今天做完今天事,且看織女對牛郎。

(台語)

一年過了又一年,冬天過了又春天,
田底稻仔青見見,今年定著是豐年,
水牛赤牛滿山埔,看牛囝仔唱山歌,
青年男女犁田土,頂坵下坵相照顧。

點仔膠

點仔膠黏著腳,叫阿爸買豬腳,
豬腳箍滾爛爛,飫鬼囝仔流嘴瀾。

排骨仔隊

阮就是排骨仔隊,汝嘛是排骨仔隊; 
胸坎若樓梯,腹肚若水櫃, 
雙手金光錘,兩枝腳草蜢仔腿; 
人人攏叫阮是排骨仔隊。

十二生相
 
一鼠,賊仔名, 
二牛,駛犁兄, 
三虎,爬山崎, 
四兔,遊東京, 
五龍,皇帝命, 
六蛇,互人驚, 
七馬,跑兵營, 
八羊,食草嶺, 
九猴,爬樹頭, 
十雞,啼三聲, 
十一狗,吠契兄, 
十二豬,菜刀命。

搖嬰仔歌

嬰仔嬰嬰睏,一暝大一寸;嬰仔嬰嬰惜,一暝大一尺,搖子日落山,抱子金金看,你是我心肝,驚你受風寒。

嬰仔嬰嬰睏,一暝大一寸;嬰仔嬰嬰惜,一暝大一尺,一點親骨肉,愈看愈心適,暝時搖伊睏,天光抱來惜。

嬰仔嬰嬰睏,一暝大一寸;嬰仔嬰嬰惜,一暝大一尺,同是一樣子,那有兩心情,查甫也著疼,查某也著晟。

嬰仔嬰嬰睏,一暝大一寸;嬰仔嬰嬰惜,一暝大一尺,細漢土腳爬,大漢欲讀冊,為子款學費,責任是咱的。

嬰仔嬰嬰睏,一暝大一寸;嬰仔嬰嬰惜,一暝大一尺,畢業做大事,拖磨無外久,查甫娶新婦,查某嫁丈夫。

嬰仔嬰嬰睏,一暝大一寸;嬰仔嬰嬰惜,一暝大一尺,痛子像黃金,晟子消責任,養到恁嫁娶,我才會放心。

丟丟銅仔

火車行到伊都,阿末伊都丟,唉唷磅空內。
磅空的水伊都,丟丟銅仔伊都,
阿末伊都,丟仔伊都滴落來
 
一的抄米香
 
一的抄米香,二的抄韭菜,三的強強滾,四的抄米粉。 
五的五將軍,六的六子孫,七的蚵仔飼麵線, 
八的講伊卜分一半,九的九嬸婆,十的撞大鑼。 
打你千打你萬,打你一千零五萬,羞羞羞袂見笑, 
猜輸唔甘願,玩輸起蝦龜,唔甘願起蝦龜, 
我卜來去投老師,投老師。
 
一年仔倥倥
 
一年仔倥倥,二年仔孫悟空,    
三年仔吐劍光, 四年仔愛膨風, 
五年仔上帝公,六年仔閻羅王,閻羅王。
 
台灣出甜粿
 
喂、喂、喂,台灣出甜粿。 
甜粿真好食,台灣出木屐。 
木屐真好穿,台灣出鵁鴒。 
鵁鴒會講話,台灣出棉被。 
棉被甲會燒,台灣出芎蕉。 
芎蕉真大枇,台灣出蕃薯。 
蕃薯會止飢,台灣出飛機。 
台灣真爻飛,台灣出鼓吹。 
鼓吹真爻陳,台灣出炸彈。 
炸彈真厲害,歹人唔敢來。
 
草螟弄雞公

雞公想欲阿伊都啄草螟,
認為小隻啊伊都好創治,
草螟偏偏啊伊都不驚伊,
戲弄予伊呀伊都氣半死呀伊都,
那哎唷啊伊都氣半死。

草螟仔弄雞公,雞公披搏跳,
尖嘴啄無啊伊都小草螟,
氣到強強啊伊都要半死,
像草螟啊伊都會秉變,
這款做法呀伊都才有理呀伊都,
那哎唷啊伊都才有理。

草螟仔弄雞公,雞公披搏跳。
要學草螟啊伊都小精靈,
著愛認清啊伊都看乎明,
不敬雞公啊伊都佇面前,
伶俐活咷呀伊都好本領呀伊都,
那哎唷啊伊都好本領。

莫螟仔弄雞公,雞公披搏跳。

搖囝賢大漢
(傳統唸謠) 
  
搖仔搖,搖仔搖。 
搖囝也在叫。 
搖你大漢,我有所望。 
搖囝賢大漢,搖囝賢大漢。
 
樹頂一隻猴
 
樹頂一隻猴,樹下一隻狗。 
猴跋落來,磅著狗。 
猴亦走,狗亦走。 
唔知猴驚狗,抑是狗驚猴。
 
點仔點水缸
(傳統唸謠)
 
點仔點仔點水缸,啥乜人仔放屁爛跤尻。 
點仔點仔點茶甌,啥乜人仔今晚卜來阮兜。 
點仔點仔點茶壺,啥乜人仔今晚卜娶某。 
點仔點仔點叮噹,啥乜人仔今晚卜嫁尪。 
點仔點仔點水缸,啥乜人仔放屁爛跤尻。 
點仔點仔點書包,啥乜人仔今晚卜來阮兜。 
點仔點仔點鉛筆,你若是歹囝仔才做白賊也。 
點仔點仔點紛紛,你是英雄好漢去做軍。
 
ABC狗咬豬
 
ABC狗咬豬,阿公仔坐飛機, 
跋一下冷支支。 叫醫生,來甲伊醫, 
醫一下跤骨大小支, 
醫一下跤骨大小支。
 
人插花.伊插草
(傳統唸謠) 
 
人插花,人插花,伊插草。 
人抱嬰,人抱嬰,伊抱狗。 
人未嫁,人未嫁,伊先走。 
人坐轎,人坐轎,伊坐畚斗。 
人睏紅眠床,伊睏屎礐口。 
人睏紅眠床,伊睏屎礐口。
 
臆台灣的地名
(傳統唸謠) 

台灣的地名是真趣味,台灣的地名是真趣味。 
開張大吉臆佗位?開張大吉臆新店。 
四季如春臆佗位?四季如春臆恆春。 
雨後春筍臆佗位?雨後春筍臆新竹。
 
西北雨直直落
 
西北雨直直落,鯽仔魚卜娶某。 
鮕鮐兄拍鑼鼓,媒人婆仔土虱嫂, 
日頭暗揣無路,趕緊來火金姑, 
做好心來照路,西北雨直直落。 
西北雨直直落,白鷺鷥來趕路。 
搬山嶺過溪河,找無岫跋一倒, 
日頭暗卜怎好,土地婆做好心來帶路, 
西北雨直直落。 
 
大頭旺仔一粒珠
(傳統唸謠) 

大頭旺仔伊都一粒珠,相打唔認輸。
夯竹篙托金龜,金龜一下飛。 
哎喲大頭旺放風吹,風吹斷了線。 
大頭旺仔傢伙,哎喲去一半。 
 
一歲兩歲手裡抱
 
一歲兩歲手裡抱, 
三歲四歲塗跤脞。 
五歲六歲漸漸大, 
有時頭燒佮耳熱。 
七歲八歲真爻吵, 
一日顧伊兩支跤。 
九歲十歲教針黹, 
驚伊四界去經絲。 
十一十二著拍罵, 
此去著那學做衫。 
十三十四學煮菜, 
一塊桌面辦會來。 
十五十六卜轉大, 
驚伊綴人去風花。 
十七十八做親情, 
一半歡喜一半驚。
首頁 | 每月一曲 | 關於站長 | 吟詩樂坊 | 酷站連結 | 問題解答 
留言看板 | 音樂報報 | 教會音樂 | 童言童語 | 老爸隨筆 | English

Copyright © 2003 www.leestudio.net. All rights reserved.